Sömu lögin, segir Steingrímur

Steingrímur J. Sigfússon, formaður Vinstri-grænna, segir enga ástæðu til að ætla annað en að forseti Íslands staðfesti ekki nýju fjölmiðlalögin frekar en hin fyrri. Þetta séu sömu lögin. Því er spáð að stóru átökin um fjölmiðlafrumvarpið verði inni í allsherjarnefnd en allir formenn stjórnarandstöðuflokkanna hafa tekið þar sæti meðan málið verður þar til umræðu. Halldór Ásgrímsson, formaður Framsóknarflokksins, mælti fyrir nýja fjölmiðlafrumvarpinu á Alþingi í dag og eftir umræður var frumvarpinu vísað til allsherjarnefndar ásamt frumvarpi stjórnarandstöðunnar um þjóðaratkvæðagreiðslu. Össur Skarphéðinsson, formaður Samfylkingarinnar, segir ríkisstjórninna vera að beita brellum til að svipta þjóðina rétti sínum til að fella dóm yfir ólögum hennar í þjóðaratkvæðagreiðslu. Hann segir þetta vera sorglega niðurstöðu og dapran dag fyrir þingið. Í sögunni verði þetta álitinn „einn af svörtustu blettunum á ferli þessarrar ríkisstjórnar og töldu þó flestir að svartara gerðist það ekki eftir hraklegan stuðning hennar við stríðið í Írak,“ sagði Össur í þinginu í dag.   Steingrímur J. Sigfússon, formaður Vinstri-grænna, sagði að reynt væri að koma forsetanum í vanda sem stæði frammi fyrir því að að staðfesta lögin eða synja þeim þegar í sömu lögunum fælist að hin fyrri væru felld úr gildi. Hann sagði hins vegar að brellukokkarnir hefðu kannski gleymt einu, þ.e. að ef forsetinn staðfesti þessi „seinni ólög, þá væri hann líka að taka kosningaréttinn af þjóðinni sem hann hafði fært henni með sinni fyrri ákvörðun,“ sagði Steingrímur.   Steingrímur spurði sig hvort að ráðherrarnir væru kannski að reyna að búa til óleysanlega þvælu og leika stjórnskipun lýðveldsisns svo grátt af ásettu ráði að fara endurtekið til forsetans með lög af þessu tagi. Hann sagði þetta sama málið og spurði hvort væru miklar á því að forsetinn verði allt í einu í þannig skapi að hann taki aftur af þjóðinni þann rétt sem hann færði henni 2. júní.