Varað við þunglyndislyfjum

"Það hefur verið mikil umræða um þessi svokölluðu SSRI þunglyndislyf erlendis og að vel athuguðu máli ákváðum við að senda læknum þessa áminningu," segir Sigurður Guðmundsson, landlæknir. Embætti hans hefur í samvinnu við Lyfjastofnun sent öllum læknum á landinu dreifibréf vegna þeirrar umræðu sem átt hefur sér stað vegna hættu á notkun ákveðinna þunglyndislyfja meðal barna og unglinga. Er þar brýnt fyrir læknum landsins að ekki skuli ávísa lyfjum sem þessum nema brýna nauðsyn beri til vegna alvarlegs þunglyndis og þá aðeins gegn því að fylgst verði afar grannt með sjúklingnum í framhaldinu. Enn fremur er varað sterklega við því að hætta lyfjameðferð mjög snögglega þar sem sjúklingar hafi sýnt alvarleg fráhvarfseinkenni. "Þetta gerum við í framhaldi af umræðu sem orðið hefur í Bandaríkjunum og Evrópu. Athuganir bæði lyfjayfirvalda í Bandaríkjunum og Bretlandi eru áþekkar hvað varðar virkni ákveðinna tegunda þessara lyfja gagnvart þunglyndi en upplýsingar bentu líka til að um aukna tíðni sjálfsvígshugsana væri að ræða hjá börnum og unglingum." Þar er um að ræða lyfin Citalopram, Paroxetine, Sertraline og Venlafaxine og hafa breskir læknar verið varaðir við notkun þeirra. Sigurður segir að langur vegur sé frá því að hugsa um sjálfsvíg og gera alvöru úr því. "Það hefur ekki verið sannað að sjálfsvíg hafi orðið meðal þeirra barna og unglinga sem þátt tóku í rannsóknum á lyfjunum og ekki má gera lítið úr því að þessi lyf virka mjög vel á þunglyndi en með þessu bréfi er eingöngu verið að brýna fyrir læknum að fara að öllu með gát. Við fórum vandlega yfir allar þær rannsóknir sem gerðar hafa verið á þessum lyfjum og erum einfaldlega að koma þeim upplýsingum áfram þar sem þær gagnast mest." Í dreifibréfi því sem læknar hafa nú fengið er þeim tilmælum beint til þeirra að ákveðin SSRI lyf séu eingöngu notuð sem hluti af almennri heilstæðri meðferð. Varast skal að nota Paroxetine og Venlafaxine hjá börnum og unglingum og nota fremur önnur lyf úr sama flokki. Ekki skal ávísa SSRI lyfjum nema um alvarlegt þunglyndi sé að ræða og fylgja þarf sjúklingum þétt eftir.