Róttækari aðgerða þörf

Friðrik J. Arngrímsson, framkvæmdastjóri Landssambands íslenskra útvegsmanna, segir eðlilegt að íslenska ríkisstjórnin mótmæli 80 þúsund tonna heildarkvóta á Svalbarðasvæðinu en róttækari aðgerða sé þörf. "Málið er bara það að íslensk stjórnvöld hafa ekki staðið sig í þessu máli. Það er tími til kominn að það verði breyting þar á. Það eru íslenskir hagsmunir sem kalla á það." Friðrik vill að norskum yfirvöldum verði stefnt fyrir alþjóðadómstól. "Við óskum eftir því að það verði gert. Það þarf að klára þetta mál þannig að það sé ekki uppi á borði á hverju ári og Norðmenn misnoti aðstöðu sína. Norðmenn gera sér fulla grein fyrir því að þeir hafa enga lagalega stöðu til þess að beita þeim aðgerðum sem þeir hafa verið að beita. Það eru allir sammála um það." Þrátt fyrir ítrekaðar tilraunir fengust engin viðbrögð frá norska sjávarútvegsráðuneytinu vegna mótmæla íslenskra stjórnvalda á einhliða ákvörðun um kvótasetningu á Svalbarðasvæðinu.