Tveggja vikna gæsluvarðhald

Maður á fimmtugsaldri hefur verið úrskurðaður í tveggja vikna gæsluvarðhald í tengslum við hvarf þriggja barna móður. Ekkert hefur spurst til konunnar frá því á aðfaranótt sunnudags. Ummerki á heimili mannsins benda til voðaverks. Maðurinn sem um ræðir er fyrrum sambýlismaður konunnar. Hún er um þrítugt, fluttist hingað til lands frá Indónesíu og á ungt barn með manninum sem leiddur var fyrir dómara í dag og situr nú í gæsluvarðhaldi. Maðurinn hefur neitað því staðfastlega við yfirheyrslur að hafa átt aðild að hvarfi konunnar. Hann er sá eini sem hefur verið handtekinn vegna málsins. Síðast er vitað um ferðir konunnar aðfararnótt sunnudags þegar hún er talin hafa verið á leið í heimsókn til fyrrum sambýlismanns síns á heimili hans við Stórholt í Reykjavík. Ættingjar tilkynntu um hvarf hennar á mánudag og í gær girti tæknideild lögreglunnar húsið við Stórholt af þar sem fram fór húsleit og vettvangsrannsókn sem stóð enn yfir í dag. Samkvæmt heimildum fréttastofu fundust nægar vísbendingar á vettvangi til að handtaka manninn. Blóð fannst bæði inni í íbúðinni og fyrir utan húsið. Þá var hald lagt á vopn í eigu mannsins og bifreið sem var rannsökuð til að til að ganga úr skugga um hvort konan kynni að hafa verið flutt á brott. Lögregla verst allra frétta af málinu og segir rannsókn þess vera á viðkvæmu stigi. Leit að konunni stendur enn yfir en lögregla hefur þó ekki séð ástæðu til að auglýsa eftir henni.