Varað við orkudrykkjum og áfengi

Neysla á orkudrykkjum og áfengi samhliða hreyfingu getur valdið hjartatruflunum og í versta falli leitt til skyndilegs dauða. Matvælastofnanir í Danmörku og Svíþjóð vara fólk við örvandi orkudrykkjum. Orkudrykkir sem innihalda koffín, taurín og glucuronodeltalacton eru afar varhugaverðir samkvæmt rannsókn sænsku matvælastofnunarinnar. Þetta eru drykkir sem virka örvandi á líkamann og hafa verið vinsælir hjá ungu fólki við skemmtanahald því orkudrykkurinn veldur því að viðkomandi getur dansað taumlaust fram eftir nóttu, þrátt fyrir áfengisneyslu. Svo virðist sem einmitt þessi blanda - orkudrykkur, áfengi og hreyfing - geti verið stórhættuleg og í versta falli banvæn. Nokkrir hafa þegar látist við þessar aðstæður í Svíþjóð og var það ástæða þess að rannsóknin var gerð. Hún leiddi í ljós að þessi efni geta valdið alvarlegum hjartatruflunum og er hættan enn meiri við hreyfingu. Í kjölfarið hafa bæði sænska og danska matvælastofnunin varað við neyslu orkudrykkja. Margir drekka líka þessa drykki við íþróttaiðkun sem kann að vera varasamt. Það er því vissara að skoða innihaldslýsingu orkudrykkja. Rétt er að benda á að hér er ekki um að ræða vörur sem eru markaðssettir sem íþróttadrykkir heldur aðeins þær sem eiga að heita örvandi orkugjafar.