Engin lausn í sjónmáli

Engin lausn er í sjónmáli í kennaradeilunni. Deilendur reikna ekki með því að leggja fram sáttatilboð á fimmtudag og ríkissáttasemjari segir engar forsendur fyrir sáttatillögu. Staðan er því hin sama og þegar síðasti fundur var haldinn á fimmtudaginn. Birgir Björn Sigurjónsson formaður samninganefndar sveitarfélaganna segist ekki reikna með að sveitarfélögin geri kennurum neitt tilboð í deilunni á samningafundi næsta fimmtudag. Hann segir samninganefnd sveitarfélaga ekki hafa hist síðan upp úr viðræðunum slitnaði á fimmtudag en menn séu þó í daglegu sambandi. Finnbogi Sigurðsson formaður samninganefndar grunnskólakennara segir ekkert tilboð sé í undirbúningi að hálfu kennara. Kennarar ætli eftir sem áður ekki að gefa afslátt af þremur grundvallarkröfum sínum, sem séu minni kennsluskylda, skilgreining á vinnutíma og að svokallaður launapottur verði felldur inn í grunnlaun. Hann segir stöðuna óbreytta frá því fyrir helgi og á ekki von á neinum tíðindum á samningafundi á fimmtudag. Hann segist ekki eiga von á neinu nýju frá samninganefnd sveitafélaganna og sömuleiðis komi ekkert nýtt frá kennurum. Þeir mæti líklega með hundshaus, eins og formaður samninganefndar sveitafélaganna sagði að þeir myndu gera. Hann segir kennara alltaf tilbúna að ræða málin, en hins vegar séu fyrrgreindar þrjár kröfur algerlega ófrávíkjanlegar og verði það áfram. Birgir Björn Sigurjónsson segir þessar kröfur bæði dýrar og skaðlegar fyrir skólastarfið enda feli þær í sér að verkstjórnarvald skólastjóra verði minnkað til muna. Ásmundur Stefánsson ríkissáttasemjari segir að ef deilendur séu enn í sömu sporum sé tæplega forsenda fyrir því að leggja fram miðlunartillögu. Slíkar tillögur séu til þess fallnar að brúa eitthvað bil, en ekki að gera hreinlega nýjan samning eins og þyrfti til í þessu tilfelli.