Jón Ragnarsson ákærður

Ríkislögreglustjóri hefur gefið út ákæru á hendur Jóni Ragnarssyni framkvæmdastjóra og stjórnarformanni Lykilhótela fyrir umboðssvik. Samkvæmt ákæru er honum gefið að sök að hafa tekið skuldabréfalán hjá Framkvæmdasjóði Íslands árið 1998 upp á 37 milljónir króna og þar með misnotað aðstöðu sína með því að hafa ásamt öðrum stjórnarmanni veitt veðheimild til tryggingar láninu í Hótel Valhöll, en lánið var ótengt starfsemi þess. Þá hafi lánið einnig verið tryggt í fasteigninni Hótel Örk, en andvirði lánsins var notað til að greiða gjaldfallnar afborganir, vexti og dráttarvexti vegna sjö skuldabréfalána Lykilhótela hjá Framkvæmdasjóði. Málið var þingfest í dag og tók Jón sér þá frest til að ráða sér lögmann og var málinu frestað til 21. október.