Enn strandaglópar í Björgvin

Fjöldi Íslendinga eru enn strandaglópar á flugvellinum í Björgvin í Noregi vegna verkfalls flugumferðarstjóra í Osló. Vél Icelandair sem var á leið til Osló var á síðustu stundu snúið til Björgvin, en rúmlega hundrað farþegar voru um borð. Farþegar sem fréttastofan ræddi við nú síðdegis voru afar óhressir með skort á upplýsingum. Þeir sögðust nánast engar upplýsingar hafa fengið og ekkert samband næðist við áhöfn vélarinnar. Hópur fólks sem var á leið til Oslóar þáði far með rútu þangað, en það er um sjö klukkustunda akstur. Þeir sem voru að fara annað eru enn á flugvellinum, en hafa reynt að útvega sér far með öðrum vélum til Kaupmannahafnar og víðar. Guðjón Arngrímsson upplýsingafulltrúi Icelandair segir að umsjón með farþegum á flugvellinum í Björgvin sé alfarið á borði SAS, sem sjái um afgreiðslu fyrir félagið. Hann segir áhöfnina hafa verið senda á hótel til hvíldar svo hún megi fljúga vélinni frá Björgvin um leið og færi gefst. Hann segir að þegar svona óreiðuástand skapist sé erfitt að koma öllum upplýsingum alla leið. Næstu upplýsingar um flug er ekki að hafa fyrr um klukkan níu í kvöld.