Góð samviska mikilvæg

Íslenska karlalandsliðið í knattspyrnu mætir því ungverska í dag í Búdapest í forkeppni heimsmeistaramótsins. Leikurinn er mikilvægur fyrir íslenska liðið sem byrjaði mótið illa, með 3-1 tapi gegn Búlgörum heima. Logi Ólafsson, annar þjálfara íslenska liðsins, segir það mikilvægt að strákarnir taki sig saman í andlitinu og geri betur en þeir gerðu gegn Búlgörum. „Í leiknum gegn Búlgörum komumst við aldrei í þann takt sem við þurftum til að ná góðum leik. Við verðum að segja Búlgörum það til hróss að þeir héldu boltanum vel innan liðsins og voru snöggir að losa hann því þeir vissu að við værum grimmir í návígjum. Það er kann-ski tímanna tákn að Búlgarar breyta leikskipulagi sínu gegn okkur, kerfi sem þeir spiluðu ágætlega gegn Írum fyrir skömm-u. Þeir lögðu leikinn upp út frá okkar leikstíl og okkar mönnum. Það er kannski nýlunda fyrir okkur,“ segir Logi. Logi segir Ungverja leika sama leikstíl og íslenska liðið og því sé nauðsynlegt að vera sterkir í stöðunni maður gegn manni. Uppleggið okkar fyrir leikinn er hreint og beint að spila mun betri vörn en við gerðum gegn Búlgörum. Til þess að við höfum möguleika á sigri í svona keppni verðum við að spila mjög sterka vörn og halda markinu hreinu. Við erum það góðir í að koma okkur fram völlinn þegar við vinnum boltann og búa til hraðar sóknir og við verðum að styrkja okkur enn frekar í því,“ segir Logi. Rúnar Kristinsson, Pétur Hafliði Marteinsson og Brynjar Björn Gunnarsson verða fjarri góðu gamni í leiknum í dag. Rúnar og Pétur eru meiddir en Brynjar Björn í banni eftir að hafa fengið að líta rauða spjaldið gegn Búlgörum. „Við höfum góða menn og það kemur maður í manns stað. Það hefði getað verið gott að byggja ofan á liðið sem mætti Ítölum en því er ekki til að dreifa og við notum þá menn sem við höfum. Það eru kannski svolítið öðruvísi leikmenn en á margan hátt öflugir,“ segir Logi. Logi segir mikilvægt að ná góðum úrslitum úr leiknum í dag. „Það er fyrst og fremst mikilvægt fyrir okkur að koma með góða samvisku út úr leiknum þannig að við höfum gert það sem í okkar valdi stendur til að ná góðum úrslitum. Góð úrslit eru mjög nauðsynleg fyrir okkur.“