Ekkert að gerast

Formaður Kennarasambandsins og formaður launanefndar sveitarfélaga horfa fram á langt verkfall að óbreyttu. Sáttafundi í kennaradeilunni var slitið í morgun. Nýr fundur verður ekki fyrr en eftir viku. Formaður launanefndar segir að kennarar mæti að öllum líkindum með hundshaus í Karphúsið eftir viku.  Hvorug samninganefndin lagði fram tilboð til sátta í morgun, en Birgir Björn Sigurjónsson, forsvarsmaður samninganefndar Sveitafélaganna, segir sáttasemjara hafa sett fram tillögu um að aðilar færu í hugarflug á mánudaginn og launanefndin hafi verið sátt við það, en kennarar hafi alfarið hafnað því, þar sem kröfur þeirra væru ófrávíkjanlegar. ÞVí hafi slitnað upp úr viðræðum í dag. Kennarar féllust ekki á hugarflug sáttsemjara og töldu sig hafa flogið nóg í bili. Eiríkur Jónsson, formaður þeirra segir að samninganefndin verði að sína það í verki að hún sé tilbúin til þess að sína einhverjar skuldbindingar, en ekki alltaf setja fram hugmyndir um frekara spjall á óskuldbindandi nótum. Birgir segist telja þjóðfélagið hafa biðlund með samningsaðilum í viku í viðbót, en ekki lengur. Það sé krafa að reynt verði að finna lausn á þeim tíma og því hafi hann áhyggjur af því að fundur sé ekki boðaður fyrr en á fimmtudag. Kennarar komi líklega með hundshaus til þeirra viðræðna. Hann telur framvindu mála benda til þess að verkfallið verði langt, en hve langt veit hann ekki. Þó sé það framandi fyrir sér að ríkið grípi inn í með lagasetningu. Eiríkur segir hins vegar að hann meti stöðuna þannig að sveitarfélögin átti sig ekki enn á því að kennurum sé alvara með kröfum sínum. Það sé alveg ljóst að menn séu ekki að setja fram slíkar kröfur að gamni sínu, þeim sé full alvara með kröfum sínum. Mikill hugur var í kennurum í verkfallsmiðstöðinni í Borgartúni í dag. Sesselja Sigurðardóttir, varaformaður Félags Grunnskólakennara segir að boltinn sé hjá sveitarfélögunum. Það sé mikill baráttuhugur í kennurum og þeir eflist með hverjum degi. Hún segir kennara geta verið jafn lengi í verkfalli og þurfa þykir.