Sjö manns sagt upp á Vogi

Sjö starfsmönnum sjúkrahússins Vogs, sem er þungamiðja starfsemi SÁÁ, verður sagt upp og dregið saman í þjónustu við áfengis- og vímuefnasjúklinga. Ráðgjafavakt og sú bráðaþjónusta sem veitt hefur verið við göngudeild meðferðarstofnunarinnar verður lögð af. Innlögnum verður fækkað úr 2350 í 2100, eða um 10%, en við það mun svigrúm til bráða- og flýtiinnlagna minnka verulega. Dregið verður úr viðhaldsmeðferð fyrir ópíumfíkla frá því sem nú er og nýir sjúklingar munu ekki fá þessa meðferð, þótt hún þyki hafa borið mjög góðan árangur. Sjúklingar sem eru yngri en 16 ára verða ekki innritaðir á Vog og þjónusta við vímuefnafíkla sem jafnframt eru með geðsjúkdóma mun minnka. Þórarinn Tyrfingsson, framkvæmdastjóri meðferðasviðs hjá SÁÁ, segir samtökin tilneydd að rifa seglin. Sjúklingum hafi fjölgað og þeir fái meiri en þjónustu en áður sem feli í sér aukinn kostnað. „Við höfum gert grein fyrir þessum kostnaðarauka alls staðar þar sem það er hægt en ekki fengið skilning fjárveitingavaldsins,“ segir Þórarinn.  Með aðgerðunum næst 45 milljón króna sparnaður á 380 milljón króna árlegum rekstrarkostnaði á Vogi. Áfram verður staðið við þjónustusamning sem í gildi er milli heilbrigðisráðuneytisins og SÁÁ. Hins vegar verður áfram 70 milljón króna halli á sjúkrarekstri SÁÁ á ársgrunni sem samtökin munu borga.