Veðurblíðunni var misskipt

Þúsundir landsmanna komu saman og fögnuðu í tilefni dagsins þrátt fyrir að veðurblíðunni hafi verið misskipt milli landshluta. Dagskráin í höfuðborginni var vegleg í ár. Hún hófst með hefðbundnum hætti í kirkjugarðinum við Suðurgötu þar sem lagður var blómsveigur að gröf Jóns Sigurðssonar. Brynhildur Guðjónsdóttir leikkona var fjallkonan og fórst það vel úr hendi. Víðs vegar um miðbæinn voru uppákomur og skemmtanir, og á þeim verður ekkert lát fyrr um miðnætti. Fyrir þá sem vilja bregða sér í bæinn í kvöld verða Tónleikar á Arnarhóli, Harmónikuball verður í Ráðhúsinu klukkan átta, og Dansleikur á sviði vestan Alþingishússins. Fréttastofan rakst á börn í þjóðhátíðarskapi í Hafnarfirði í dag. Flestir voru ekki í neinum vafa um það að skrúðgangan hefði verið það skemmtilegast við 17. júní, þótt nokkrir væru ekki alveg með það á hreinu hvers vegna dagurinn er haldinn hátíðlegur. Það var kalt í höfðustað Norðlendinga á þjóðhátíðardaginn. Þar eru menn þó ýmsu vanir og létu slíkt ekki varpa skugga á gleðina. Um hádegisbil rigndi á nýstúdenta, en að venju útskrifaði Menntaskólinn á Akureyri nemendur sína í dag. Margt var um manninn við hátíðarhöld á Ísafirði. Veðrið lék við hvern sinn fingur. Hátíðarræður voru fluttar, Sunnukórinn söng og lúðrasveit Ísafjarðar lék tónlist. Það var fegurðardrottning Vestfjarða, Margrét Magnúsdóttir sem var fjallkona að þessu sinni. Egilsstaðabúar fóru í skrúðgöngu frá Hótel Héraði að Tjarnargarði í tilefni dagsins. Fólk virtist skemmta sér ljómandi vel þótt veðrið væri ekki upp á marga fiska. Líkt og svo víða annars staðar verður nóg við að vera fram undir kvöld eystra.