Hættir störfum sem íþróttastjóri

Íþróttafélag stúdenta kvaddi Valdimar Örnólfsson með hófi í gærkvöldi en hann hætti í vor sem íþróttastjóri Háskólans eftir nærri 37 ára starf. Valdimar söng á Austurvelli í morgun sem einn af Fóstbræðrum en Valdimar hefur löngum þótt liðtækur söngmaður. Fréttastofa hittui Valdimar á heimili hans í Breiðholtinu í dag í tilefni þess að hann hefur nú látið af störfum. Valdimar segir að árin í Háskólanum hafi verið mjög skemmtileg. Nemendur, kennarar og íþróttafélagsfólkið hafi allt verið ánægjulegir hópar. Íþróttafélagið gaf honum golfkylfu og áður hafði hann fengið golfsett. Hann var á yngri árum einn fremsti skíðamaður þjóðarinnar og keppti meðal annars á ólympíuleikum. Þá var hann fastur heimilisgestur landsmanna í aldarfjórðung þegar hann annaðist morgunleikfimina í Ríkisútvarpinu ásamt Magnúsi Péturssyni. Hann rak skíðaskólann í Kerlingarfjöllum í 36 sumur en varð að hætta því vegna snjóleysis. Valdimar sagðist vera ósköp ánægður að vera kominn í frí og njóta ellinnar. Hann sagðist horfa bjartsýnn til framtíðar.