Skólpleiðsla loksins lögð

Ekki snúast allar framkvæmdir í Fjarðarbyggð um álversframkvæmdir. Daglegur rekstur sveitarfélagsins hefur heldur aukist við þær framkvæmdir, en daglegt líf gengur sinn gang og kappkostað er þessa dagana að nota veðurblíðuna til að framkvæma verk sem hafa beðið. Það á til dæmis við um lagningu skolpleiðslu út fyrir stórstreymsfjöru og var röri, sem er um 200 metra langt og 50 cm í þvermál, nýlega komið fyrir neðan við Bakkahverfið þar sem lengi hefur staðið til að gera bragarbót á frárennslismálum. Skólprörið, sem stóð út úr bakkanum neðan við byggðina, gekk almennt undir nafninu "fallbyssan" og var mörgum mikill þyrnir í augum. Nutu menn aðstoðar sanddæluskips sem er á Norðfirði og verður uppgröftur úr höfninni notaður til að þekja rörið.