Þetta er allt að koma, sigraði

Íslensku leiklistarverðlaunin, Gríman, voru afhent við hátíðlega athöfn í Borgarleikhúsinu í gærkvöldi. Sýning ársins er "Þetta er allt að koma", sýning Þjóðleikhússins á leikgerð Baltasars Kormáks á bók Hallgríms Helgasonar. Baltasar var einnig tilnefndur leikstjóri ársins. Leikarar ársins voru þau Eggert Þorleifsson, sem hlaut verðlaunin fyrir frammistöðu sína í verkinu "Belgíska Kongó" og svo Brynhildur Guðjónsdóttir, sem þótti skara framúr í hlutverki Edith Piaf. Bestu aukaleikararnir voru valin þau Björn Thors í Græna landinu og Steinunn Ólína Þorsteinsdóttir í Ríkarði þriðja. Almenningur hafði kost á að taka þátt í vali sigurvegara í einum flokki, og bar Chicago þar sigur úr bítum, var valin vinsælasta sýningin. Guðrún Helgadóttir, rithöfundur, afhenti verðlaun fyrir barnaleikrit í fjarveru Vigdísar Finnbogadóttur, fyrrverandi forseta Íslands. Vigdís vildi ekki bendla forsetaembættið við umræðu um fjölmiðlalögin sem hún taldi að yrði óhjákvæmilegt í ljósi þess að Baugur fjármagnar hátíðina. Sýningin Dýrin í Hálsaskógi hlaut þau verðlaun.