Hrun loðnustofns kostar milljarða

"Það er engin skýring á því af hverju loðnustofninn ætti að vera hruninn og persónulega hef ég ekki trú á því," segir Björgólfur Jóhannsson, forstjóri Síldarvinnslunnar og formaður Landssambands íslenskra útvegsmanna. Hver sá dagur sem líður án þess að tangur né tetur finnist af loðnu á Íslandsmiðum gerir útvegsmenn áhyggjufyllri og fer þeim fjölgandi sem grunar að stofninn sé einfaldlega hruninn. Mun Hafrannsóknastofnunin gera úrslitatilraun næstu tvær vikur til leitar fyrir vestan og austan land og hafa fjölda loðnuveiðiskipa sér til fulltingis. Björgólfur segir að ef í ljós komi að stofn loðnu hér við land sé hruninn sé það áfall fyrir þjóðarbúið í heild og ekki einungis sjávarútveginn. "Það hefur engin vísindaleg úttekt verið gerð á efnahagslegum áhrifum þessa ef satt reynist en mér telst lauslega til að þjóðarbúið verði af tíu til ellefu milljörðum króna í útflutningstekjum. Þá eru ótalin öll önnur áhrif sem slíkt hefði óneitanlega í för með sér. Mörg störf í landvinnslunni mundu tapast og bræðslur færu strax að finna fyrir loðnuskorti. Þá er ómögulegt að segja til um áhrifin á aðra fiskistofna en fræðingar segja að loðnan sé mjög mikilvæg fæðutegund og enginn veit í hvað annar fiskur sækir ef engin er loðnan." Jón Kristjánsson fiskifræðingur telur ekki ólíklegt að loðnustofninn sé hruninn. "Það hafa komið fram ákveðnar vísbendingar í þá átt. Sjórinn hefur hitnað talsvert og það er sannað að loðnan þolir það illa. Í þokkabót má ekki gleyma því að veturinn 2001-2002 var mikill fugladauði fyrir norðan land, sem gaf til kynna að lítið væri af fiski á ferðinni. Það er í raun undarlegt að menn skuli vera hissa á þessu því náttúran hefur verið síbreytileg í milljónir ára og furðulegt að ganga að því sem vísu að allt sé á sínum stað ár eftir ár." Seint verður gert of mikið úr mikilvægi loðnu við strendur landsins. Hún er ein mikilvægasta fæða margra tegunda, þar á meðal hvala, sela, sjófugla og bolfisks.