Ásatrúarmenn reyna að ná sáttum

Lögsögumaður Ásatrúarfélagsins, Lára Jóna Þorsteinsdóttir, segir engan klofning meðal ásatrúarmanna en vel verði tekið á móti sáttanefnd Reykjavíkurgoðorðs. Lögsögumaðurinn segir að engin óreiða sé í bókhaldi félagsins og ef fyrrverandi allsherjargoði telji sig vita um slíkt, sé það frá fyrri tíð sem hann þekki betur. Jörmundur Ingi fyrrverandi allsherjargoði og fylgismenn hans stofnuðu í gær formlegt félag, Reykjavíkurgoðorð, sem sjálfstætt félag ásatrúarmanna frá Ásatrúarfélaginu. Lára Jóna segir ekki um klofning að ræða meðal ásatrúarmanna. „Við höfum vitað af því í tvö ár að 10-15 manns eru óánægðir vegna þess að Jörmundur Ingi var settur frá sem allsherjargoði. Af okkar hálfu er hins vegar allt í góðu,“ segir lögsögumaðurinn.   Á fundi Reykjavíkurgoðorðs í gær var ákveðið að skipa sáttanefnd sem leitaði sátta milli Reykjavíkurgoðorðs og Ásatrúarfélagsins. Lára segir sitt fólk munu lýsa griðum og vonar að fulltrúar Reykjavíkurgorðorðs muni gera slíkt hið sama. Jörmundur Ingi sagði í fréttum Stöðvar 2 fyrir helgi að ástæða væri til að krefjast opinberrar rannsóknar á fjárreiðum Ásatrúarfélagsins og hann segir það verða kannað, takist ekki sættir. Lára kveðst ekki óttast slíka athugun.   LÁRA 3.