Ráðherra tekur undir með rektor HÍ

Björn Bjarnason dómsmálaráðherra tekur undir með Páli Skúlasyni, rektor Háskóla Íslands í ræðu hans við brautskráningu við skólann í gær, að nauðsynlegt sé að vanda umræður og huga að rökum viðmælenda sinna. Þetta kemur fram á heimasíðu Björns, www.bjorn.is Ráðherrann segir ræðu rektors hafa leitt huga hans að því hve allar umræður vegna væntanlegrar þjóðaratkvæðagreiðslu eru enn sem komið er fjarri efni málsins sjálfs. Það er, spurningunni um eignarhald á fjölmiðlum og hvort menn vilja að því sé dreift eða á einni hendi.         Björn gerir DV líka að umtalsefni sínu sem honum finnst minna stundum á svokölluð furðufréttablöð sem hann segir fræða lesendur sína um ferðir marsbúa og annað í þeim dúr. Uppspunafréttir séu ein leið til að selja blöð og oft einkennist þær af  skemmtilegheitum, en það eigi reyndar ekki við um slíkar „fréttir“ í DV því þar sé jafnan einhver broddur byggður á illkvitni í garð einstaklinga sem ritstjórn blaðsins flokkar sem andstæðinga sína.Öðrum sé hins vegar hampað umfram eðlilegt fréttamat.   Björn líkur pistli sínum á að hrósa bloggsíðum en hann segir mun skemmtilegra að kynna sér það sem þar er að gerast og gerjast „en að fylgjast með nauðhyggjumönnunum neikvæðu og nafnlausu, sem setja mestan svip á málverja og aðra spjallþræði um stjórnmál.“