Rannsókn á áhrifum háspennulína

Drífa Hjartardóttir, þingmaður Sjálfstæðisflokksins, vill að heilbrigðisyfirvöld rannsaki möguleg áhrif háspennulína, spennistöðva og fjarskiptamastra á mannslíkamann. Hún er ásamt Sigríði Önnu Þórðardóttur, verðandi umhverfisráðherra, og fleirum, flutningsmaður þingsályktunartillögu um málið.  Þetta er í fjórða skipti sem Drífa og fleiri þingmenn eru flutningsmenn þingsályktunartillögu um þetta mál. Samkvæmt henni yrði Alþingi falið að rannsaka á næstu tíu árum möguleg áhrif af völdum háspennulína og sérstaklega með tilliti til nýgengis krabbameins. Í greinargerð með tillögunni er bent á að erlendar rannsóknir leiði æ meiri líkur að því að rafsegulssvið hvers konar geti haft alvarleg áhrif á heilsu og líðan fólks og jafnvel valdið krabbameini. Varað er við því að háspennulínur og möstur séu t.a.m. of nálægt heimilum og barnaheimilum. Landsvirkjun hefur fengið heimild til að leggja rafmagnslínur austur á Héraði vegna Kárahnjúkavirkjunar. Einn þeirra fimm bænda sem fyrirtækið hefur ekki náð samkomulagi við, vegna lagningar línu á landi hans, sagði í fréttum Stöðvar tvö nýverið að íbúðarhús hans yrði í innan við 150 metra fjarlægð frá línunni og í því fælist aðaltjónið. Drífu Hjartardóttur skilst að mjög erfitt sé að gera faraldsfræðilega rannsókn í líkingu við þá sem hún hafi farið fram á og því hefur hún hug á að breyta tillögu sinni í haust, m.a. með því að skipta henni niður í fjórar tillögur. Drífa segir hins vegar að ef möstrin eru of nálægt híbýlum manna þá verði einfaldlega að taka tillit til þess.