Barn veiktist af Trópí

Eins árs drengur veiktist fyrir nokkru eftir að haf adrukkið gallaðan Trópí. Í DV í fyrradag kom fram að drengur hefði veikst vegna ávaxtadrykkjarins Svala frá Vífilfell sem einnig var gallaður. Fyrirtækið viðurkenndi mistök sín sem stöfuðu af bilun í gerilsneyðingarvél og var töluvert magn af bæði Trópí og Svala kallað inn frá verslunum þegar málið kom upp. Þetta gerðist um miðjan síðasta mánuð en fyrirtækið lét ekki viðskiptavini vita af gölluðu vörunum. Eftir að DV hafði samband við fyrirtækið í gær var send út fréttatilkynning þar sem fólk var beðið um að skila inn bæði Svala og Trópí með ákveðinni dagsetningu. Fullyrt var við blaðið að ekki væri vitað um fleiri tilfelli þar sem einhver hefði veikst vegna drykkjanna en annað hefur komið á daginn. "Ég er með eins árs gamalt barn sem drakk tvo og hálfan Trópí hjá mér og fékk alveg pípandi niðurgang. Ég hringdi í hjúkrunarfræðing sem skoðaði strákinn og kom í ljós að hann var með einhvers konar gerileitrun," segir ung móðir sem hafði samband við DV.