Grænlenskt sorp til Íslands?

Sorp frá Grænlandi mun kannski verða flutt til eyðingar á Ísafirði áður en langt um líður. Þetta var meðal þess sem rætt var á fundi bæjarstjórnar Ísafjarðarbæjar með Jens Napaatoq, samgönguráðherra Grænlands, í dag. Fréttavefur Bæjarins besta greinir frá. Aðalumræðuefni fundarins var möguleg viðskipti milli Ísafjarðarbæjar og Grænlands, og þá sér í lagi Austur-Grænlands, og tókst hann vel að sögn Birnu Lárusdóttur, forseta bæjarstjórnar. Samgönguráðherra Grænlendinga sagði það koma vel til greina að flytja sorp frá Grænlandi til eyðingar á Ísafirði þar sem fullbúin sorpeyðingarstöð er til staðar. Núna er sorpið ávallt flutt til Danmerkur til eyðingar. Á fundinum var einnig mikið rætt um ferðaþjónustumál, þ.á m. þann möguleika að halda úti ferjusiglingum á milli Vestfjarða og Grænlands hluta árs. „Ýmis samskipti milli Ísafjarðarbæjar og Austur-Grænlands eru vel möguleg og þá ekki síst vegna þess að engin önnur höfn í Evrópu er nær þeim“, segir Birna. Fundarmeðlimir lýstu yfir vilja sínum til að koma á betri samskiptum á milli Ísafjarðarbæjar og Austur-Grænlands og áhuga á að hittast aftur seinna í ár til að skiptast á og ræða hugmyndir frekar.