Fálkaorðan á Ebay

Eitt af æðstu heiðursmerkjum íslenska ríkisins, hin íslenska fálkaorða, er nú til sölu á bandaríska uppboðsvefnum Ebay og hafa áhugasamir fjóra daga til stefnu til að slá út núverandi boð sem eru rúmar 18 þúsund krónur. Alls átta aðilar hafa gert tilboð hingað til. Þetta er ekki í fyrsta sinn sem þetta heiðursmerki gengur kaupum og sölum erlendis, Slíkt hefur átt sér stað áður enda mun töluverður fjöldi fálkaorða hafa verið veittar gegnum tíðina. Samkvæmt upplýsingum á viðkomandi vefsíðu er þarna um að ræða eina af níu orðum sem veittar voru í Portúgal fyrir 30 árum síðan. Stefán Stefánsson, sem sæti á í orðunefnd Forsetaskrifstofu, segir það geta passað. Venja sé að deila út orðum í opinberum heimsóknum og fjöldinn geti verið nokkur við hvert tilefni. Hann segir uppátæki sem þessi ekki vel séð en við þessu sé afar lítið að gera enda sé þetta ekki í fyrsta sinn sem íslenskar orður séu seldar með þessum hætti.