Ekkert varðskipanna við eftirlit

Varðskipið Ægir kemur til hafnar í vikunni og stoppar í nokkra daga. Þá verður ekkert varðskipanna þriggja við eftirlit á landhelgislínunni. Hafsteinn Hafsteinsson, forstjóri Landhelgisgæslunnar, segir gæslustörf með eðlilegum hætti en skipin þurfi sitt viðhald.  Áformað er að varðskipið Ægir komi til hafnar og verði í stoppi í nokkra daga en varðskipið Týr er í stoppi fram í ágúst og Óðinn væntanlega út þetta ár. Sumir hafa gagnrýnt að varpskipin skuli ekki vera öll til taks til þess að hafa með höndum eftirlit og vörslu fiskveiðilögsögunnar, eða eftirlit með öryggi sjófarenda, og telja að vegna ástandsins sé ekki hægt að gæta þessa fjöreggs þjóðarinnar með eðilegum hætti. Landhelgin sé þannig opin og óvarin á meðan mörg erlend skip sæki á landhelgislínuna. Hafsteinn Hafsteinsson, forstjóri Landhelgisgæslunnar, segir eðilega staðið að gæslustörfum um þessar mundir. Hann segir að ákveðið hafi verið að hafa tvö varðskip í rekstri á þessu ári en ekki sé greint frá því hvar þau séu stödd á hverjum tíma. Skipin þurfi ennfremur sitt viðhald og eitt skipanna sé notað tímabundið. Hafsteinn segir Landhelgisgæsluna nýta þau skip sem til taks séu eins vel og hún geti. Auk þess séu þyrlur gæslunnar og Fokker Friendship flugvél notaðar, sérstaklega þegar fara þarf á fjarlæg mið. Hann segir þess vegna langt frá því að starfsemi Landhelgisgæslunnar liggi niðri á meðan viðhald skipanna stendur yfir, auk þess sem hægt sé að ná skipunum úr viðgerð með um þriggja klukkustunda fyrirvara.   Hægt er að hlusta á viðtal við Hafstein með því að smella á hlekkinn sem fylgir fréttinni.