5-7 ára fangelsi fyrir smygl

Krafist er 5-7 ára fangelsis yfir konu frá Síerra Leóne sem tekin var í Leifsstöð með um fimmþúsund e-töflur þann 10. júní síðastliðinn. Efnin fundust í farangri konunnar en það vakti mikla athygli að hún er barnshafandi. Við aðalmeðferð málsins í Héraðsdómi Reykjaness í gær neitaði konan sök og krafðist sýknu. Hún segist ekki hafa vitað af efnunum í farangri sínum og hefur við yfirheyrslur gefið mögulegar skýringar á því hverjir gætu hafa komið þeim fyrir. Þær skýringar hafa ekki verið teknar trúanlegar. Konan hefur einnig sagt að hún hafi ætlað að hitta tiltekinn mann hér á landi en ekki hefur heldur tekist að sannreyna þann framburð. Konan segist hafa stundað vændi víða um Evrópu og að ferðin til Íslands hafi átt að verða hennar síðasta tækifæri til vændis áður en hún yrði léttari. Verjandi konunnar krefst sýknu og til vara vægustu refsingar af mannúðarástæðum, enda hafi konan búið við hörmungar frá barnæsku og leiðst ung út í vændi. Konan situr í gæsluvarðhaldi í kvennafangelsinu í Kópavogi til 28. júlí en dómur verður líklega kveðinn upp áður en varðhaldið rennur út. Meðfylgjandi mynd var tekin þegar sótt var um gæsluvarðhald yfir konunni í síðasta mánuði.