Banaslys á Vantsnesvegi

Banaslys varð er bíll fór út af Vatnsnesvegi við Valdalæk, skammt frá Hvammstanga, um klukkan 20 í gærkvöld. Kona lést og önnur slasaðist alvarlega en fimm erlendir ferðamenn voru í bílnum. Samkvæmt upplýsingum lögreglunnar á Blönduósi var fólkið frá Slóveníu. Svo virðist sem ökumaður hafi misst stjórn á bílnum í lausamöl með þeim afleiðingum að hann fór út af og valt margar veltur. Þyrla Landhelgisgæslunnar, TF-LÍF, var kölluð út á ellefta tímanum og lenti hún með konuna sem slasaðist alvarlega við Landspítalann í Fossvogi um hálf eittleytið í nótt. Hún liggur á gjörgæsludeild en aðrir í bílnum sluppu með minni áverka. Fyrr í gær hafði þyrla Landhelgisgæslunnar sótt konu sem slasaðist illa er bíll fór út af þjóðveginum í Langadal í Austur-Húnavatnssýslu um fjögurleytið í gær. Hún var fyrst flutt með sjúkrabíl til Blönduóss en var talin alvarlega slösuð og því var kallað á þyrluna sem var þá á Eyjafjarðarsvæðinu. Fernt var í bílnum en hinir þrír slösuðust minna samkvæmt upplýsingum frá lögreglunni á Blönduósi.