Stal bílum og skemmdi

Stolnum bíl var ekið á ljósastaur á Austurvegi í Grindavík í fyrrinótt. Ökumaður bílsins var farinn af vettvangi þegar lögregla kom á staðinn. Nítján ára piltur sem passaði við lýsingu á ökumanninum var handtekinn í Þórkötlustaðahverfi skömmu síðar. Pilturinn er grunaður um ölvun við akstur. Við nánari skoðun kom í ljós að bílnum hafði verið stolið í Grindavík en hann var ólæstur og með lyklunum í. Fjarlægja þurfti bílinn með dráttarbifreið. Sami piltur er grunaður um að hafa farið inn í nokkrar bifreiðar í Grindavík. Einum bílnum hafði verið ekið stuttan spöl og utan í annan bíl.