Rás 1 og 2 lágu niðri

Bilun í spennugjafa í útsendingarborði Rásar 2 í morgun varð til þess að útsendingar beggja rása Ríkisútvarpsins lágu niðri í fimmtán mínútur á höfuðborgarsvæðinu. Deildarstjóri hljóðdeildar RÚV telur ekki þörf á frekari aðgreiningu rafkerfisins. Útsendingarrofið hefði verið minna ef rafmagn hefði farið af öllu húsnæðinu. Rétt fyrir níufréttir í morgun varð bilun í spennugjafa í stúdiói 1, þaðan sem var verið að senda út útsendingu Rásar 2. Álagið á rafkerfið var það mikið að höfuðrofi í töflu fyrir hluta hljóðvera Ríkisútvarpsins sló út og voru þau hljóðver því rafmagnslaus. Þannig var þögn á öllu dreifikerfinu, þrátt fyrir að sendarnir væru virkir, þar sem hvorki barst útsendingarmerki til sendanna frá Rás 1 né Rás 2. En ekki voru öll hljóðver Ríkisútvarpsins rafmagnslaus. Runólfur Þorláksson, deildarstjóri hljóðdeildar RÚV, segir að starfsfólk hafi verið flutt í önnur hljóðver og þau tengd inn á dreifikerfið í stað þeirra sem voru dauð. Eftir um fimm mínútur hófust útsendingar á langbylgju og á landsbyggðinni. Útsendingar á höfuðborgarsvæðinu hófust hins vegar ekki fyrr en eftir að minnsta kosti fimmtán mínútna rof. Runólfur segir skýringuna vera þá að forgangsröðunin hafi einfaldlega verið sú að tengja inn landsbyggðina fyrst og það hafi tekið nokkrar mínútur til viðbótar að tengja nýju hljóðverin við sendana á Vatnsenda og Skálafelli. Hefði rafmagnið farið af öllu húsinu segir Runólfur að skiptingin yfir á varaleiðir hefði tekið skemmri tíma; það hefði verið erfiðara að eiga við bilunina í morgun þar sem hluti hússins var rafmagnslaus. Aðspurður hvort hann sé sáttur við tímann sem það tók að koma báðum rásum Ríkisútvarpsins í loftið á ný, m.a. í ljósi umræðunnar um öryggishlutverk RÚV, segir Runólfur að menn séu að sjálfsögðu aldrei ánægðir þegar svona gerist. Það taki hins vegar alltaf einhvern tíma að tengja upp ný hljóðver og flytja mannskapinn á milli. Spurður hvort ekki sé þörf á aðgreiningu rafkerfisins segir Runólfur að það sé aðgreint en bilunin hafi verið það umfangsmikil að rafmagnið hefði farið af hljóðverum beggja rása. Þetta er mjög óvenjulegt að sögn Runólfs og eru rafvirkjar að skoða málið.