Lægri vextir á nýjum íbúðabréfum

Lægri vextir og frjálsara val þegar kemur að greiðslutíma lána eru meðal kosta nýrra íbúðabréfa Íbúðalánasjóðs sem taka við að húsbréfunum um næstu mánaðamót. Um þessar mundir stendur Íbúðalánasjóður fyrir kynningu á nýja kerfinu og skiptimöguleikum fyrir banka og peningastofnanir. Framkvæmdastjóri sjóðsins, Guðmundur Bjarnason, telur að nýju bréfin þyki vænlegur kostur fyrir fjárfesta, sem skili sér í lægri vöxtum til þeirra sem versla ekki með húsbréf nema til þess eins að koma sér þaki yfir höfuðið. Óvissa um yfirverð eða afföll bréfanna verða úr sögunni því í nýja kerfinu fær fólk þau greidd út í peningum, með vaxtakjörum sem vitað er um fyrirfram. Guðmundur segir að væntingar Íbúðalánsjóðs séu að hagurinn af breytingunum fari til lántakans.   Boðið hefur verið upp á lán til 25 og 40 ára, en frá og með mánaðamótum geta kaupendur valið um lán til 20, 30 eða 40 ára. Fasteignaeigendur, sem nú þegar greiða afborganir til Íbúðalánasjóðs, stendur til boða að lengja eða stytta afborgunartímann í samræmi við nýtt kerfi. Guðmundur segir að breytingarnar, og möguleikar á breytingu lána og greiðslubyrðinni því samfara, séu kynntar á heimasíðu sjóðsins,  www.ils.is.