Ófullnægjandi upplýsingar á Netinu

Verulega skortir á að upplýsingar þeirra sem selja vöru og þjónustu á Netinu séu fullnægjandi. Þetta er niðurstaða Samkeppnisstofnunar sem nýverið kannaði um 10 þúsund íslenskar vefsíður og gerði athugasemdir við fjórðung þeirra. Um 2500 fyrirtæki, félög og einstaklingar mega búast við orðsendingu frá Samkeppnisstofnun þar sem vakin er athygli á að upplýsingar á vefsvæðum þeirra eru ekki í samræmi við lög. Þeim er jafnframt bent á að koma þeim málum í rétt horf. Fyrir tveimur árum var Samkeppnisstofnun, með lagasetningu, falið að hafa eftirlit með þeim sem láta í té rafræna þjónustu. Hún felur meðal annars í sér að neytendavernd í rafrænum viðskiptum skuli ekki vera lakari en í hefðbundnum viðskiptum. Í könnun Hagstofunnar frá því í fyrra kom í ljós að fimmt hver maður á aldrinum 16 til 74 ára hafði pantað eða keypt vöru eða þjónustu á Netinu en verulega virðist skorta á að þeir sem stunda sölumennsku á Netinu uppfylli lögákveðna upplýsingaskyldu. Rétt er að geta þess að brot á lögum um rafræn viðskipti og aðra rafræna þjónustu varða sektum, en brot á lögum um fjarsölu varða sektum eða fangelsi allt að þremur árum.