Eldisþorskur eftirsóttari

Erlendir fiskkaupendur greiða hærra verð fyrir íslenskan eldisþorsk en villta þorskinn samkvæmt reynslu Brims fiskeldis við Eyjafjörð. Að vísu er um mjög lítið magn að ræða sem slátrað er hjá Brimi, eða 1,5-4 tonn á viku, en viðtökur lofa góðu. Að sögn Óttars Más Ingvasonar, framkvæmdastjóra Brims, legst margt á eitt. Í fyrsta lagi er fisknum slátrað rétt fyrir útflutning þannig að hann er glænýr. Hann er holdmeiri, stinnari og hvítari en villti þorskurinn en allir þessir eiginleikar eru eftirsóttir. Þá geta kaupendur stólað á visst magn frá eldinu að staðaldri, óháð því hvernig gefur á sjó eða hvernig veiðist. Loks stjórnar framleiðandinn öllu ferlinu, allt frá slátrun og þar til fiskurinn er kominn í hillur verslana, þannig að svonefndur líftími fisksins sem ferskur fiskur lengist til muna. Allt þetta lofar góðu en Óttar Már tekur fram að þrátt fyrir það sé mikil þróunarvinna framundan áður en þorskeldi verður arðbær atvinnmugrein hér á landi. Framundan sé meðal annars að þróa heppilega eldisstofna, líkt og gert hefur verið í laxeldinu, sem geti tekið a.m.k. tíu ár. Brim safnar bæði lifandi villtum smáþorski til eldis og elur upp seiði sem klakið er í Þorlákshöfn. Að sögn Óttars Más gengur hvort tveggja vel.