Norðurljós ekki á móti lögum

Sigurður G. Guðjónsson, forstjóri Norðurljósa, segir það fagnaðarefni að fjölmiðlafrumvarpið verði dregið til baka. Hann segist ekki vera á móti því að sett verði lög um eignarhald á fjölmiðlum, en fólk sem þekki fjölmiðla verði að koma að setningu slíkra laga. Sigurður segist fagna því að Norðurljós fái að starfa áfram í óbreyttri mynd. Það sé farsæl lausn fyrir alla að hætt verði við að setja sérstök lög á hendur Norðurljósum sem valdið hafi jafn miklum titringi í þjóðfélaginu og raun ber vitni. Vel komi þó til greina að setja lög af einhverju tagi um eignarhald á fjölmiðlum. Um þau ummæli forsætisráðherra frá því fyrr í dag að stjórnarandstaðan hafi ekkert haft til málanna að leggja í umræðum um fjölmiðlafrumvarpið og að forsvarsmenn hennar hringi í Norðurljós til að athuga stöðu mála sagði Sigurður að það væru bara orð forsætisráðherra.