D-listi vill vernda húsið

Sjálfstæðismenn í borgarstjórn vilja vernda Austurbæjarbíó og vilja að kannað verði hvort hægt verði að reka þar menningarstarfsemi til frambúðar. Meirihlutinn í borgarstjórn telur ekki að borgin eigi að skipta sér af rekstri í húsinu. Stöð 2 sagði frá því gær að samkvæmt samningi við fyrri eiganda Austurbæjarbíós, Árna Samúelsson, er ekki leyfilegt að hefja kvikmyndahúsarekstur að nýju í húsinu. Árni vildi þannig tryggja að lenda ekki í frekari samkeppni á bíómarkaði. Sjálfstæðismenn í borgarstjórn eru andvígir því að rífa húsið og telja að þrátt fyrir þessa staðreynd hljóti að vera unnt að finna rekstrargrundvöll í húsinu. Vilhjálmur Vilhjálmsson, oddviti sjálfstæðismanna, telur að borgarayfirvöld eigi að setjast niður með eigendum hússins, og jafnvel fleiri aðilum, og kanna alla hugsanlega möguleika. R-listinn telur ekki forsvaranlegt að borgin taki þátt í rekstri hússins. Reykjavíkurborg eigi nóg með að standa fyrir rekstri Borgarleikhússins, Iðnó og Tjarnarbíós, auk þess sem stefnt sé að því að byggja tónlistar- og ráðstefnuhús fyrir milljarða króna. Steinunn Valdís Óskarsdóttir, formaður skipulagsnefndar borgarinnar, segir að alls ekki komi til greina að sínu mati að borgin kaupi húsið af verktökum og fari að reka þar menningarstarfsemi. Vilhjálmur segist ekki skilja þessar yfirlýsingar yfirvalda og finnst þær ekki tímabærar.  Í könnun um helgina kom fram að 70% borgarbúa vilja hlífa húsinu. Aðspurð hvernig starfsemi geti þá þrifist í því segir Steinunn Birna Ragnarsdóttir að hún vilji sjá húsið sem „menningarhús með reisn “ og þá hugsi hún til slíks húss sem er í Helsinki. Það sé allt í senn kvikmyndahús, kaffihús, bókasafn, tónleikasalur o.fl. og sameini menningarlegar samkomur sem eigi sér einhvern samnefnara á því sviði.