Brunavarnir ófullnægjandi í skólum

Brunavarnir í framhaldsskólum landsins eru enn ófullnægjandi í sjö af hverjum tíu skólum, samkvæmt nýrri úttekt Brunamálastofnunar. Úrbætur hafa verið gerðar í um fjórðungi framhaldsskóla. Samkvæmt ársskýrslu Brunamálastofnunar var staðan þessi í verst settu framhaldskólum landsins í fyrra: Iðnskólinn í Reykjavík fékk einkunnina slæmt og sömuleiðis Fjölbrautarskóli Vesturlands á Akranesi. Brunavarnir voru óviðunandi í Menntaskólanum á Akureyri, þær voru slæmar í Verkmenntaskóla Austurlands og sömuleiðis í Menntaskólanum á Egilsstöðum. Eftir könnun Brunamálastofnunar á dögunum kemur í ljós að Brunavarnir hafa batnað í Iðnskólanum í Reykjavík sem fær nú einkunnina sæmilegt sem þýðir að brunavarnir eru í lagi í aðalatriðum. Sömu sögu er að segja af Fjölbrautarskóla Vesturlands. Óviðunandi ástand er komið upp í slæmt í Menntaskólanum á Akureyri, úrbætur eru hins vegar á eftir áætlun en átti að ljúka á næsta ári. Stutt er í að skólinn komist upp í sæmilegt. Ekkert hefur verið gert í brunavörnum í Verkmenntakóla Austurlands en stefnt er að úrbótum við stækkun skólans á næsta ári. Loks hafa úrbætur verið gerðar í Menntaskólanum á Egilsstöðum. Heildarbreytingin milli ára varðandi brunavarnir í framhaldsskólum er sú að jafn margir skólar fá einkunnina ágætt nú og í fyrra, 28%. Nokkrar úrbætur hafa verið gerðar á breytingunni milli ára í flokkunum sæmilegt og slæmt. Færri eru með slæmar brunavarnir og fleiri með sæmilegar. Eftir sem áður eru brunavarnir í framhaldsskólum landsins ófullnægjandi í 72% tilvika.