Skar hársbreidd frá slagæð

Lögregla telur það mildi að ekki fór verr en raunin varð þegar leigubílstjóri var skorinn sextán sentímetra löngum skurði á háls með hnífi í vesturborg Reykjavíkur í nótt. Bílstjóranum blæddi talsvert eftir árásina en aðeins munaði hársbreidd að hnífurinn, eða lagvopnið, skæri sundur slagæð upp til höfuðsins. Fjórir menn eru í haldi lögreglu vegna rannsóknar málsins. Þeir voru farþegar í bílnum en um klukkan hálf tvö nam bílstjórinn staðar að ósk þeirra. Var þá lagt til hans með hnífi en honum tókst að tilkynna árásina og forða sér út úr bílnum. Lögreglumenn sem voru skammt frá voru þegar sendir á vettvang og kallað var á allt tiltækt lið. Bílstjórinn var þegar fluttur á slysadeild þar sem gert var að sárum hans en lögreglumenn náðu öllum fjórum mönnunum á flótta og handtók þá. Tildrög eru óljós þar sem rannsókn er á frumstigi og er meðal annars óljóst hvort mennirnir stóðu sameiginlega að árásinni. Þó er ljóst að aðeins einn þeirra veitti bílstjóranum áverkann. Mennirnir, sem allir hafa gerst brotlegir við lög áður, voru drukknir og í annarlegu ástandi. Þeir verða ekki yfirheyrðir fyrr en þeir hafa sofið úr sér vímuna. Þá er árásarvopnið ófundið en allt bendir til þess að það hafi verið beittur hnífur. Bílstjórinn er enn á sjúkrahúsi en á batavegi og er sagður munu ná sér að fullu