Pattstaða á Dalvík

Bæjarstjórn Dalvíkurbyggðar hefur ekki enn getað komið sér saman um hvort hætta skuli rekstri Húsabakkaskóla eða ekki. Skiptar skoðanir eru um málið milli allra flokka í bæjarstjórn. Fyrir fund bæjarstjórnar Dalvíkurbyggðar í gær lá fyrir að taka ákvörðun um framtíð Húsabakkaskóla. Fulltrúar Sjálfsstæðisflokks leggja til að hann verði sameinaður Dalvíkurskóla og benda á að einungis sex kílómetrar skilji skólana að. Framsóknarmenn sem eru með þeim í meirihluta bæjarstjórnar hafa viljað skoða málið betur. Svanhildur Árnadóttir, Sjálfsstæðisflokki, er forseti bæjarstjórnar Dalvíkurbyggðar og segir hún enga niðurstöðu hafa komið fram. Þrjár tillögur hafi verið lagðar fram og þær hafi allar verið felldar. Sjálfsstæðismenn lögðu sem sagt til að Húsabakkaskóli yrði sameinaður Dalvíkurskóla skólaárið 2005-2006 og að kennsla myndi öll fara fram í Dalvíkurskóla. Framsóknarmenn lögðu til að stofnaður yrði 3ja manna vinnuhópur til að skoða málið sem skila ætti tillögum um málið 31. mars næstkomandi. I-listi lagði hins vegar til að Húsabakkaskóli yrði starfræktur áfram um ókomna tíð. Þar að auki lágu fyrir fund bæjarstjórnar annars vegar um að bæjaryfirvöld ákveddu áframhaldandi rekstur og stofnuðu breiðan vinnuhóp um framtíðarstefnu og uppbyggingu skólans og hins vegar tillaga um að framkvæmd verði athugun á hagræðingu af sameining skólanna tveggja. Engin þessarra fimm tillagna hlaut brautargengi þannig að óhætt er að segja að bæjarfulltrúar hafi ekki getað komið sér saman um neitt í tengslum við að ákveða framtíð Húsabakkaskóla. Svanhildur segir algera pattstöðu ríkja núna og næsta skref sé að menn ræði saman og reyni að komast að einhverri niðurstöðu. Svanhildur segist ekki geta sagt til um hvort þetta mál verði til þess að meirihlutinn springi, en ljóst sé að ágreiningur hafi verið á milli samstarfsflokkana. Annað kvöld verður opinn fundur um skólamál í Dalvíkurbyggð, á vegum Framfarafélags Dalvíkurbyggðar. Segir í tilkynningu að fundurinn sé haldinn í framhaldi þeirra miklu umræðna og átaka sem staðið hafa undanfarið um skólamál á svæðinu.