Hress á 100 ára afmæli

Hún er hundrað ára í dag, en hefur aldrei legið á sjúkrahúsi og fór í siglingu fyrir tveimur árum. Hún á marga tugi afkomenda og er löngu orðin langa-langamma. Hin hláturmilda heiðurskona Margrétar Hannesdóttur, sem finnst að unglingar nú til dags ættu að vinna meira, hélt upp á afmæli sitt í dag. Það er eins og Margrét Hannesdóttir sé áratugum yngri en hún er í raun og veru, þar sem hún tekur á móti hinum mikla fjölda ættingja og vina í safnaðarheimili Áskirkju í dag. Margrét er elst tíu systkina, og hafa fjögur þeirra náð yfir 90 ára aldri. Hún býr enn heima á Langholtsveginum, en ólst upp á Núpsstað í vestur Skaftafellssýslu. Hún segir æskuna í dag öðruvísi en hún var þegar hún var ung. Þá hafi unga fólkið fylgst með og unnið með fullorðna fólkinu. Margrét hefur yndi af trjárækt og ferðalögum, og fór síðast í siglingu til Þýskalands fyrir tveimur árum síðan. Hún hefur alltaf verið góð til heilsunnar. Segist aldrei hafa orðið misdægurt svo hún myndi eftir. Margrét er í forkunnarfögrum upphlut sem hún klæddist fyrst á brúðkaupsdegi sínum árið 1930. Þá giftist hún Samúel Kristjánssyni, en saman eignuðust þau fimm börn. Margrét segir það guðs gjöf þegar hún er spurð hverju hún þakki góða heilsu.