Formenn hittast á fundi í dag

Búist er við að formenn stjórnarflokkanna hittist á fundi í dag og ræði breytta stöðu í fjölmiðlamálinu. Halldór Ásgrímsson formaður Framsóknarflokksins er væntanlegur til Reykjavíkur í dag en hann hefur verið úti á landi vegna dauðsfalls í fjölskyldunni. Búist er við að hann hitti Davíð Oddsson í dag til að ræða stefnubreytingu Framsóknarmanna en unnið hefur verið í málinu undanfarna daga. Eins og greint var frá í fréttum Stöðvar 2 í gær vill forysta Framsóknarflokksins að fjölmiðlafrumvarpið verði dregið til baka. Líklegast er að óskað verði eftir að nýtt frumvarp verði lagt fram sem felli fjölmiðlalögin úr gildi, en að öðrum kosti verði þjóðaratkvæðagreiðsla. Þetta hafði Fréttastofa Stöðvar 2 eftir áreiðanlegum heimildum úr herbúðum flokksforystu Framsóknarflokksins í gær en stefnubreytingin var rædd á fundi forystumanna flokksins í Utanríkisráðuneytinu. Áhrifamiklir menn innan Framsóknarflokksins hafa hist á fundi undanfarna daga, samkvæmt heimildum fréttastofu og rætt málið og áhrif þess innan flokksins. Litið er á stöðuna nú sem prófraun á Halldór í formannsembætti flokksins en þetta er alvarlegasti ágreiningurinn sem komið hefur upp í stjórnarsamstarfinu. Eiríkur Tómasson prófessor í stjórnskipun við Háskóla Íslands segir að ef að hvorki Sjálfstæðismenn eða Framsóknarmenn bakki í málinu og það valdi stjórnarslitum þá komi til kasta forseta Íslands að ræða við forsætisráðherra og svo aðra formenn flokkanna, hvort það séu aðrir möguleikar á starfhæfri ríkisstjórn sem hafi meirihluta á Alþingi eða minnihlutastjórn sem nýtur hlutleysis meirihluta Alþingis sem lýsir sig þá tilbúinn til að verja stjórnina falli. Ef ekki getur forsætisráðherra beðið forsetann að rjúfa þing og skuli þá kjósa innan 45 daga. Eiríkur Tómasson segir eðlilegt að forsetinn taki sér einhvern tíma til að kanna stöðuna áður en hann fallist á að rjúfa þing. Hann segir að ekki hafi verið leitað til hans formlega um það pólitíska landslag sem nú hafi skapast en það hafi borið á góma í óformlegum samtölum hans við menn að undanförnu. Svo virðist sem stjórnarmeirihlutinn vilji tefja málið inni í Allsherjarnefnd meðan formenn stjórnarflokkanna komast að niðurstöðu. Niðurstaða formannanna ef þeir ná saman yrði þá tillaga meirihluta allsherjarnefndar Alþingis.