Norsku krónprinshjónin í Garðabæ

Það var glatt á hjalla í Garðabæ í dag þegar norsku krónprinshjónin fengu í fyrsta skipti tækifæri til þess að komast út á meðal fólks. Gríðarleg stemning var í Garðatorgi þar sem stór hópur barna beið í eftirvæntingu eftir hinum tignu gestum og ætlaði sér að syngja fyrir þá. Ólafur Ragnar Grímsson, forseti Íslands, og Dorrit Moussaieff komu með krónprinshjónunum í Garðatorg þar sem beið þeirra fjölmenni. Dorrit og Mette-Marit voru afhent blóm en við lá að feimnin yfirbugaði sumt yngsta fólkið. Gestirnir skoðuðu myndasýningu eftir börn í Garðabæ þar sem þau settu fram sínar hugmyndir um konungdæmi og kóngafólk. Svo sungu börnin Öxar við ána fyrir gestina og forsetinn tók undir með þeim. Ásdís Halla Bragadóttir, bæjarstjóri í Garðabæ, bauð gestina velkomna og síðan opnaði Hákon krónprins norska keramiksýningu í Garðatorgi. Að því loknu gengu gestirnir yfir að Hofsstöðum þar sem Ragnheiður Traustadóttir fornleifafræðingur leiddi þá um minjar frá fyrstu byggð manna á Íslandi. Á Hofsstöðum stóð óvenjulega reisulegur skáli í fornöld sem fannst fyrir tilviljun við jarðrask vegna byggingar leikskóla. Landnámsmennirnir þar hafa væntanlega verið frá Noregi og krónprinshjónin höfðu því eðlilega mikinn áhuga á staðnum. Talið er að skálinn hafi verið í notkun frá landnámi fram á tólftu öld. Þar hefur meðal annars fundist forkunarfögur bronsnæla en samskonar næla fannst við fornleifauppgröft í Noregi.