Nýr Dettifossvegur á næsta ári

Framkvæmdir við nýjan Dettifossveg, vestan Jökulsár, eiga að hefjast á næsta ári. Áætlað er að verkið í heild kosti allt að 1200 milljónum króna. Flestir ferðamenn sem koma að Dettifossi koma að honum að austanverðu. Ástæðan er einfaldlega sú að aðalvegurinn að fossinum er austanmegin Jökulsár. En þetta mun sennilega breytast á næstu árum því með nýjum vegi má ætla að í framtíðinni muni meirihluti ferðamanna koma að fossinum að vestanverðu. Þar liggur nú jeppaslóði, niðurgrafinn og hlykkjóttur malarvegur, sem opnast seint á vorin og lokast í fyrstu snjóum á haustin. Á næsta ári á hins vegar að hefja lagningu nýs 52 kílómetra langs vegar um Hólmatungur, frá Ásbyrgi og að hringveginum á Mývatnsöræfum. Áformað er að hann verði með bundnu slitlagi en gert er ráð fyrir að vegurinn austan ár verði áfram malarvegur. Vegagerðin hefur kynnt drög að matsáætlun vegna nýja vegarins en þar kemur fram að tilgangur framkvæmdarinnar sé að stuðla að farsælli þróun ferðamennsku á svæðinu og styrkja byggðarlög í Þingeyjarsýslum með bættu vegasambandi milli byggðakjarna. Verkið verður unnið í áföngum en heildarkostnaður er talinn verða á bilinu 900-1200 milljónir króna.