Búið að gera við brúna

Vegagerðarmenn gerðu í morgun við brúna yfir Núpsvötn á hringveginum austan við Kirkjubæjarklaustur, eftir að hluti af nýrri málmklæðningu á brúargólfinu flettist upp í veðurofsanum í gærmorgun. Þjóðvegi eitt var þá lokað á milli Skeiðarár og Lómagnúps og var ekki opnaður fyrr en upp úr klukkan tíu í morgun. Vegagerðarmenn gátu ekkert aðhafst í gær vegna veðurofsans. Jafnframt eru vegagerðarmenn að huga að vegaskemmdum á Fróðárheiði á Snæfellsnesi þar sem malbik flettist af veginum á að minnsta kosti hundrað metra kafla. Sá kafli er vel fær þótt hann verði ekki malbikaður strax. Glæður loguðu í heyi að bænum Knerri á Snæfellsnesi alveg fram á kvöld í gærkvöldi, eftir að þar kviknaði í í fyrrakvöld með þeim afleiðingum að á milli 600 og 700 fjár drápust þegar fjárhúsin brunnu. Talið er að þetta sé eitthvert mesta búfjártjón hjá einum bónda í Íslandssögunni. Eins og fram er komið var bóndinn illa tryggður fyrir tjóninu, sem talið er hlaupa á tugum milljóna króna. Eldsupptök eru enn ókunn, en eldurinn virðist hafa kviknað í hlöðu við fjárhúsin. Rannsóknarmenn eru nú á vettvangi. Betur fór austur á landi þegar fjölmennu liði björgunarsveitarmanna tókst að bjarga tugum ef ekki hundruðum lamba og kinda, sem voru hætt komin í Eiðaþinghá á Fljótsdalshéraði í gær. Þegar björgunarmenn komu á vettvang við erfiðar aðstæður, voru margar kindur við það að örmagnast þar sem blautur snjór hafði sest í ullina og hálf frosið, þannig að kindurnar voru að sligast og örmagnast. Þá munaði minnstu að þær færu að troðast undir við girðingar, þegar þær voru að hopa undan illviðrinu, en með harðfygli tókst a koma fénu í hús.