Fáir á innsetningu forseta

Helmingur ríkisstjórnarinnar verður fjarverandi þegar Ólafur Ragnar Grímsson verður settur inn í embætti forseta Íslands á sunnudag. Forseti Íslands, Ólafur Ragnar Grímsson sver embættiseiða til næstu fjögurra ára á sunnudag. Athöfnin hefst með guðsþjónustu í Dómkirkjunni og síðan ganga forsetahjónin til Alþingishússins ásamt gestum. Þar fer sjálf athöfnin fram og síðan ganga forsetahjónin fram á svalir Alþingis. Athygli vekur að að minnsta kosti helmingur íslensku ríkisstjórnarinnar verður fjarverandi við innsetningarathöfnina. Þar ber fyrstan að telja Davíð Oddsson, forsætisráðherra, sem er að jafna sig eftir aðgerð. Geir H. Haarde, fjármálaráðherra er erlendis, og einnig verða fjarverandi Árni Mathiesen, sjávarútvegsráðherra, Valgerður Sverrisdóttir, viðskipta- og iðnaðarráðherra, Siv Friðleifsdóttir, umhverfisráðherra og Árni Magnússon, félagsmálaráðherra. Fjórir ráðherrar verða viðstaddir athöfnina svo vitað sé; Halldór Ásgrímsson, utanríkisráðherra og starfandi forsætisráðherra, Guðni Ágústsson, landbúnaðarráðherra, Jón Kristjánsson heilbrigðisráðherra og Sturla Böðvarsson samgönguráðherra. Ekki fengust upplýsingar frá dómsmálaráðuneyti og menntamálaráðuneyti um hvort Björn Bjarnason og Þorgerður Katrín Gunnarsdóttir myndu mæta við innsetningarathöfn forseta Íslands á sunnudag.