Tilkynningum um nauðganir fækkar

Síðustu tvö ár hefur tilkynningum um nauðganir um verslunarmannahelgina fækkað. V-dagssamtökin, sem berjast gegn nauðgunum, segja tilætlaðan árangur ekki nást fyrr en nauðganir hafi verið stöðvaðar algjörlega um þessa helgi og hætt verði að líta á þær sem eðlilegan fylgifisk útihátíða. Eftir verslunarmannahelgina árið 2001 kom 21 kynferðisafbrotamál til kasta neyðarmóttöku fyrir fórnarlömb nauðgana. Ári seinna hafði ekkert þessara mála farið fyrir dómstóla. Aðeins þrjú þeirra voru kærð. V-dagssamtökin stóðu fyrir auglýsingaherferð fyrir Verslunarmannahelgina næstu tvö ár. Auglýsingarnar voru ágengar, enda vöktu þær athygli með spurningum eins og: Nauðgar vinur þinn? Árin tvö sem á eftir komu voru mun færri nauðganir tilkynntar. Nú hafa samtökin enn á ný lagt af stað með herferð. Hildur Sverrisdóttir, framkvæmdastjóri V-dagssamtakanna, segir að enn virðist nauðganir mjög óeðlilegur fylgifiskur útihátíða, það eigi ekki við rök að styðjast þar sem nauðganir eigi ekkert skylt við skemmtanir.