Úttekt á íbúð ekki enn lokið

Úttekt á íbúð þroskahefts manns í Breiðholti, sem hafði verið lofað fyrir þremur mánuðum, er ekki enn lokið. Maðurinn hefur búið í ósamþykktum bílskúr í tvö ár. 20. apríl flutti Stöð 2 síðast frétt af íbúð Ásgeirs Ísaks Kristjánssonar að Hólabergi 76 í Breiðholti. Þann dag átti að gera úttekt á íbúðinni. Samkvæmt dagbókarfærslum byggingafulltrúans í Reykjavík var þá samþykkt endurtekin umsókn félagsmálaráðuneytisins, sem leigir út íbúðina, um breytingar á bílskúrnum í tvær íbúðir, sem hafði gleymst að gera. Fyrsta áfangaúttekt var ekki gerð fyrr en þriðja júní. Fyrsti hluti lokaúttektar fór fram mánuði síðar, sjötta júlí. Þá voru gerðar nokkrar athugasemdir, meðal annars við að brunavarnir væru ófullnægjandi. Ragnar H. Hall, lögmaður Ásgeirs veltir því fyrir sér hvort kröfur um eldvarnir séu bara einhver pappírsmál. Hann segir að það verði að vera hafið yfir vafa þegar ríkið leggi skjólstæðingum sínum til húsnæði og leigi það út, þá verði það að uppfylla þær kröfur sem gerðar eru um slíkt húsnæði í einu og öllu. Í dag var eldvarnarfulltrúi á svæðinu. Í samtali við Stöð 2 sagðist hann eingöngu hafa gert úttekt á íbúð, sem er við hliðina á íbúð Ásgeirs Ísaks. Svæðisskrifstofa málefna fatlaðra og iðnaðarmenn á svæðinu í dag segja lagfæringar hafa verið gerðar en það er ekki staðfest í dagbókarfærslum byggingarfulltrúa.