Lífshættuleg snuð bönnuð

Löggildingarstofa hefur lagt bann við sölu á blikkandi snuðum, sem áttu að verða einskonar tískuleikföng á útihátíðum helgarinnar. Snuðið sakleysislega er ætlað stálpuðum krökkum og unglingum en alsjáandi umhyggjusamir verndarar fólksins á Evrópska efnahagssvæðinu telja snuðið hinsvegar geta verið háskalegt og jafnvel lífshættulegt.  Það geti auðveldlega losnað í sundur þannig að rafhlöður geti hrokkið ofan í kok viðkomandi og kæft hann. Þá sé strengur, sem fylgi snuðinu of langur þannig að hann geti valdið hættu á kyrkingu og loks er talin hætta á að fólk geti ruglast á snuðinu og barnasnuði, og stungið því upp í óvita. Bónus og fleiri verslanir hafa þegar brugðist við þessum háska og fjarlægt blikksnuðin úr hillum sínum.