Áttu ekki að yfirgefa flugvöllinn

Hallgrímur Sigurðsson, yfirmaður friðargæsluliðsins í Kabúl, segir að hann hafi verið að sækja teppi í verslun í borginni þegar ráðist var á íslensku friðargæsluliðana í Kabúl á laugardag. Engu að síður höfðu vestræn sendiráð, öryggissérfræðingar og hjálparstofnanir bent á að líklegt væri að hryðjuverkamenn réðust til atlögu á Chicken Street, þar sem ráðist var á Íslendingana. Höfðu sendiráð og samtök hvatt starfsmenn sína til að halda sig fjarri þessari götu að því er segir í fréttaskeyti Agence France Presse um málið. Halldór Ásgrímsson forsætisráðherra sagði aðspurður eftir ríkisstjórnarfund á mánudag að friðargæsluliðarnir ættu fyrst og fremst að vera inni á flugvellinum sem þeir reka. Þó væri ekki hægt að koma í veg fyrir öll ferðalög. Arnór Sigurjónsson, skrifstofustjóri friðargæslunnar, sagði í blaðaviðtali í vor, eftir að norskur hermaður var myrtur í Kabúl, að íslensku friðargæsluliðarnir færu ekki út af vallarsvæðinu nema brýna nauðsyn bæri til. Þeir voru hins vegar í einkaerindum þegar þeir urðu fyrir sjálfsvígsárásinni á laugardag. Engar öryggisreglur voru þó brotnar með ferðinni að sögn Hallgríms. Íslendingarnir voru inni í versluninni þegar tilræðismaðurinn gekk að bifreið þeirra og sprengdi sjálfan sig í loft upp. Hann auk bandarískrar konu og afgansks barns sem voru á götunni létust. Íslendingarnir yfirgáfu staðinn samstundis og gátu ekki gefið sér tíma til að hlúa að særðum vegna hættu á frekari árásum. Þeir voru fullvopnaðir en beittu vopnunum ekki þar sem árásin tók skjótt af. Þeir báru bæði vélbyssur og skammbyssur. Halldór Ásgrímsson vísaði því á bug að gefið hefði verið í skyn að starf Íslendinganna væri hættulítið. "Það hefur aldrei verið gefið í skyn að menn séu ekki í hættu," segir Halldór. "Þess vegna eru menn með vopn, hjálma og í skotheldum vestum." Arnór Sigurjónsson sagði þegar Íslendingar tóku við Kabúlflugvelli að þeir væru nokkuð öruggir, en þó væri alltaf erfitt að sjá hættuna nákvæmlega fyrir eins og erfitt er að sjá fyrir bílslys í Reykjavík.