Þolinmæðin að bresta

Það er enn fullkomlega óljóst hver tekur við knattspyrnuliði Grindavíkur. Félagið hafði komist að samkomulagi við Guðjón Þórðarson um að taka við liðinu en þegar kom að undirritun samningsins opnuðust gluggar fyrir Guðjón í Englandi. Hann brá því undir sig betri fætinum, stökk upp í flugvél og gerir allt hvað hann getur til þess að komast inn um eins og einn glugga. Það hefur ekki enn skýrst hvort Guðjóni verði hjálpað inn um einhvern gluggann og líklegt er að það skýrist ekkert næstu vikuna. Á meðan safnar samningurinn ryki í Grindavík og það sætta stjórnarmenn Grindavíkur sig ekki við til lengdar. Þeir eru að missa þolinmæðina gagnvart Guðjóni og þurfa að fá skýr svör frá honum fljótlega því ekki geta þeir verið þjálfaralausir mikið lengur. "Við munum heyra í Guðjóni á næstu dögum og þá vonandi skýrast þessi mál," sagði Jónas Þórhallsson, formaður knattspyrnudeildar Grindavíkur, í samtali við Fréttablaðið í gær. "Við erum ekki tilbúnir að bíða út í hið óendanlega. Ef Guðjón ætlar að halda áfram að leita að starfi úti þá verðum við að fara að skoða aðra möguleika því ekki getum við verið þjálfaralausir mikið lengur. Við getum beðið eftir Guðjóni fram að áramótum ef við finnum engan á meðan en ef við finnum einhvern góðan þjálfara þá verðum við að stökkva af stað og gera eitthvað." Jónas segir að það hafi verið draumur hjá honum lengi að fá Guðjón til starfa í Grindavík og því vill hann ekki gefa upp alla von enn sem komið er. Guðjón hefur ekki setið auðum höndum í Englandi síðustu vikur, hann ræddi til að mynda við menn frá Leicester um síðustu helgi og hann á fund með mönnum frá öðru félagi í byrjun næstu viku. Það er því ljóst að hann getur ekki gefið Grindavík jákvætt svar alveg strax. "Ég veit ekkert hvað verður úr þessum málum. Það er alveg ómögulegt að spá og maður verður bara að taka því sem kemur," sagði Guðjón við Fréttablaðið í gær en hann sá Leicester spila gegn sínu gamla félagi, Stoke, um síðustu helgi. Guðjón sagði stöðuna varðandi Grindavík vera þá sömu og áður og hefði ekkert breyst af hans hálfu. Því væri ákaflega lítið annað um málið að segja.