Stjórnvalda að lækka matvöruverð

Varaformaður Samfylkingarinnar segir það í höndum stjórnvalda að lækka matvælaverð hér á landi og þau geti ekki vísað ábyrgðinni á því eitthvert annað. Nær væri að lækka skatt á matvöru en tekjuskatt. Ísland er dýrasta ferðamannaland í heimi samkvæmt nýlegum útreikningum breska fyrirtækisins ECA International. Enn fremur benda niðurstöður nýlegrar skýrslu Hagfræðistofnunar Háskóla Íslands til þess að Íslendingar búi við eitt hæsta matvælaverð í Evrópu. Ingibjörg Sólrún Gísladóttir, varaformaður Samfylkingar, segir hið háa verð á Íslandi bæði koma niður á almenningi í landinu og samkeppnishæfni landsins í ferðamálaiðnaði. Hún segir stjórnvöld hafa það í hendi sér að ná fram verulegum verðlækkunum á matvöru. Hún segir ástæður auðvitað margþættar en ljóst sé að stjórnvöld hafi það á sínu valdi að ná niður matarverðinu umtalsvert. Það geti þau bæði gert með því að hætta að setja styrki til landbúnaðarins í gegnum vöruverðið og hins vegar með því að lækka virðisaukaskattinn á matvælum. Miklu nær væri fyrir forsætisráðherra að byrja á því að lækka matvöruverð heldur en að lækka tekjuskatt eins og hann ætli sér að gera nú.