Svartsýnisspá um stjórnarskrá

Ný stjórnarskrá Evrópusambandsins kemur endanlega í veg fyrir að Ísland og Noregur gangi nokkurn tímann í sambandið, segir í umfjöllun norska Fiskeríblaðsins um nýju stjórnarskrána. Íslenska sérfræðinga í Evrópumálum greinir á um hvort hér sé einungis um að ræða svartsýnisspá. Í stjórnarskrá Evrópusambandsins er kveðið á um að fiskveiðiauðlindir séu sameiginlegar auðlindir sambandsríkja. Fiskeribladet segir að verði stjórnarskráin, sem leiðtogafundurinn samþykkti um síðustu helgi, samþykkt í öllum 25 aðildarríkjunum verði forræði sjávarútvegsmála og fiskveiðistefnu miðstýrt frá Brussel og aðildarlöndin missi þann rétt að stjórna fiskveiðum í sinni lögsögu. Blaðið segir að því hafi verulega dregið úr möguleikunum á því að Norðmenn og Íslendingar sæki um aðild að sambandinu. Haft er eftir talsmanni skoska þjóðernisflokksins Angus Robertsson, að ef stjórnarskráin verði samþykkt, þá séu líkurnar á því að Ísland og Noregur gangi inn í sambandið álíka miklar og að snjóbolti bráðni ekki í Helvíti. Þetta er langsvartsýnasta túlkunin á ákvæði stjórnarskrárinnar að mati Einars Páls Tamimi, forstöðumanns Evrópuréttarstofnunar Háskólans í Reykjavík. Hann bendir á að engar útskýringar sé að finna í stjórnarskránni á því hvernig staðið verður að því að úthluta veiðiréttindum. Til dæmis hvort byggt verði á veiðihefðum eða einhverju öðru. Hans mat er að blaðið dragi þarna miklar ályktar á afar hæpnum forsendum. Framkvæmdastjóri Heimssýnar, Birgir Tjörvi Pétursson, sem barist hefur gegn aðild Íslands að Evrópusambandinu er þó á öðru máli. Hann segir að þótt ekki komi fram hvernig veiðiréttindum verði úthlutað, þá sé ljós að full yfirráð yfir sjávarútvegsmálum verði hjá Evrópusambandinu, en ekki aðildarríkjum. Allt annað sé óskhyggja. Hann tekur undir með Fiskeribladet og segir nú enn ólíklegra að Íslendingar sæki um aðild að sambandinu, nema stjórnvöld ákveði að sjávarútvegurinn skipti ekki máli og vilji láta Evrópusambandið sjá alfarið um þann málaflokk.