Stofnun gegn spillingu

Dómsmálaráðherrar Norðurlanda eru sammála um að herða baráttuna gegn alþjóðlegri glæpastarfsemi á borð við peningaþvætti, verslun með fólk og fíkniefnasmygl, en slík glæpastarfsemi hefur aukist umtalsvert undanfarin ár og þykir mjög ógnandi. Dómsmálaráðherrarnir sátu sameiginlegan fund á Höfn í Hornafirði í dag og stýrði Björn Bjarnason fundinum, en Ísland gegnir nú formennsku í norrænu ráðherraranefndinni. Rætt var um það hvernig finna mætti samnorrænar lausnir gegn spillingu og meðal tillagna í því sambandi var stofnun sérlegra stofnana eða aðila til að berjast gegn spillingu eins og nefnt er í samningi SÞ gegn spillingu.