Óvenjuleg loðnuvertíð

Fimm stór fiskiskip halda til loðnuleitar í dag og á morgun og Hafrannsóknaskipið Árni Friðriksson bætist svo við á föstudag. Í venjulegu árferði væri sumarvertíðin komin í fullan gang. Við eðlilegar aðstæður hefði vertíðin hafist fyrir þremur dögum, en lítið sem ekkert hefur fundist af loðnu þrátt fyrir mikla leit. Hafís truflaði reyndar leitina að ungloðnu í vetur, en hvað sem því líður virðist ástandið vera óvenjulegt. Skipin fimm eiga að leita eftir ákveðnu kerfi og finni eitthvert þeirra loðnu, kemur Árni Friðriksson á vettvang, gerir talningu og tekur sýni. Leiðangursstjóri þar um borð mun svo stjórna leitinni. Loðnan er kaldsjávarfiskur og því eftilvill ekkert óeðlilegt þótt hún finnist ekki enn, enda fer sjór hér við land hlýnandi. Hún fannst til dæmis í Grænlandssundi í fyrravor. Þrátt fyrir það skilaði hún sér í venjulegu magni að landinu í vetur til hrygningar og var veiði góð. Fjarvist hennar frá landinu kann hinsvegar að boða erfiðleika fyrir aðrar fisktegundir við landið, sem éta mikið af loðnu, þær þurfa að snúa sér að öðru æti og jafnvel að éta undan sér.